தமிழர் வாழ்க்கையில் ராமாயணம் ஒரு கதையாக மட்டுமல்ல, ஒரு வாழ்வியல் நெறியாகவும் நிலைத்து நிற்கிறது. ராமன், சீதா, ராவணன் போன்ற பாத்திரங்கள், நற்பண்புகள் மற்றும் தீய குணங்களின் அடையாளங்களாக தமிழர் மனதில் பதிந்துள்ளன. இதன் தாக்கம் அவர்களின் அன்றாட பேச்சு வழக்கிலும் வெளிப்படுகிறது; அதற்குச் சிறந்த சான்றாக பல பழமொழிகள் உள்ளன. தமிழர்கள் ராமாயணத்தில் ஆழ்ந்த தேர்ச்சி பெற்றுள்ளனர் என்பதும் இவற்றின் மூலம் வெளிப்படுகிறது.

இந்தப் பழமொழிகள் வெறும் சொற்றொடர்கள் அல்ல; அவை வாழ்க்கை அனுபவம், ஒழுக்கம், சமூகவியல் சிந்தனை ஆகியவற்றை சுருக்கமாக எடுத்துரைக்கும் ஞானக் கூறுகள். குறிப்பாக, ராமனின் நற்பண்புகள் இவற்றில் தெளிவாக பிரதிபலிக்கின்றன. “ராமன் வாக்குக்கு இரண்டு உண்டோ?” என்ற பழமொழி, அவர் சொன்னதை ஒருபோதும் மீறாத நேர்மையும் உறுதியும் கொண்டவராக இருந்ததைச் சுட்டிக்காட்டுகிறது. “ராமன் உள்ள இடம் அயோத்தி” என்பது அவர் இருந்த இடமே தர்மம் நிறைந்த புனித நிலம் என்பதைக் குறிக்கிறது.

மேலும், ராமனின் தலைமைத் திறனும் மனிதநேயமும் பல பழமொழிகளில் வெளிப்படுகின்றன. “ராமனைப் போல ராஜா இருந்தால் அநுமானைப் போலச் சேவகனும் இருப்பான்” என்பது, நல்ல தலைவராக இருந்ததால் அவருக்கு உண்மையான, அர்ப்பணிப்பான துணைவர்கள் கிடைத்தார்கள் என்பதைக் காட்டுகிறது. “மரியாதை ராமன் வழக்குத் தீர்த்தாற் போல” என்றது, அவர் நீதியுடனும் மரியாதையுடனும் முடிவுகளை எடுத்தார் என்பதை எடுத்துரைக்கிறது.

மேலும், “விடிய விடிய கதைக் கேட்டு சீதைக்கு ராமன் சித்தப்பா” என்ற பழமொழி, ஒரே விஷயத்தை பலமுறை கேட்டாலும் தவறாகப் புரிந்து கொள்ளும் மனித இயல்பை வெளிப்படுத்துகிறது. “ராமேஸ்வரத்துக்கு போகும்போது பாம்பனாறு குறுக்கிட்டது போல” என்றது, வாழ்க்கையில் ஏற்படும் தடைகளை எடுத்துரைக்கும் ஒரு உருவகமாக உள்ளது.

ராமனின் வாழ்க்கை ஒரு ஒழுக்க நெறியாக தமிழர் மனதில் பதிந்துள்ளது. அவர் தர்மம், உண்மை, கடமை ஆகியவற்றை முன்னிலைப்படுத்தியவர். இதனால், அவரை மையமாகக் கொண்ட பழமொழிகள் மனிதன் எப்படி வாழ வேண்டும் என்பதற்கான வழிகாட்டியாக அமைந்துள்ளன. இந்தப் பழமொழிகள் மூலம், நல்லொழுக்கம் என்பது வெறும் கோட்பாடு அல்ல; நடைமுறையில் பின்பற்ற வேண்டிய ஒன்றாகும் என்பதும் தெளிவாகிறது.

மேலும், இந்தப் பழமொழிகள் தமிழர் அறிவின் கூர்மையையும் காட்டுகின்றன. ஒவ்வொரு மனித குணத்திற்கும் ஒரு ராமாயணம் சார்ந்த உருவகம் பயன்படுத்தப்படுகிறது. நல்லவன் என்றால் ராமன், கெட்டவன் என்றால் ராவணன், நேர்மை என்றால் ராமன் வாக்கு என வாழ்க்கையை புரிந்து கொள்ள எளிய வடிவில் இவை உதவுகின்றன.

பழமொழிகள் – அட்டவணை

முடிவு:

இந்தப் பழமொழிகள் அனைத்தும் சேர்ந்து பார்க்கும்போது, தமிழர் ராமாயணத்தை வெறும் கதை என அல்லாமல் பக்தியுடன் கற்று, அதை வாழ்க்கையில் நடைமுறைப்படுத்தியுள்னர் என்பதை தெளிவாக காட்டுகின்றன. அந்த வாழ்வியல் அனுபவமே இவ்வளவு பல பழமொழிகளாக உருவெடுத்து, இன்று வரை அன்றாட பேச்சில் வாழ்ந்து கொண்டிருக்கிறது.